நேபாள தலைநகர் காத்மண்டு மற்றும் பிற முக்கிய நகரங்களில் கடந்த சில வாரங்களாக பரபரப்பான போராட்டங்கள் நடைபெற்று வருகின்றன. இளம் தலைமுறை, குறிப்பாக ஜென்-இசட் (Gen Z) வாலிபர்கள், சமூக வலைத்தளங்களுக்கான தடையை நீக்க கோரி பெரும் அளவில் சாலைகளில் குதித்து போராட்டம் நடத்தி வருகின்றனர். நேபாள அரசு, இணையம் மற்றும் சமூக வலைத்தளங்கள் இளைஞர்களைத் தவறான பாதைக்கு இட்டுச் செல்கின்றன என்ற காரணத்தால் தற்காலிகமாகத் தடை விதித்தது.
நேபாள வன்முறை
ஆனால், தகவல் தொடர்பு சுதந்திரத்தை மீறுவதாகக் கருதி ஆயிரக்கணக்கான இளைஞர்கள் காத்மண்டு உட்பட பல்வேறு இடங்களில் ஆர்ப்பாட்டத்தில் ஈடுபட்டனர். இந்த போராட்டம் தீவிரம் அடைந்த நிலையில், அரசு கடும் அழுத்தத்துக்குள் சிக்கியது. இறுதியில், சமூக வலைத்தளத் தடை உத்தரவை நேபாள அரசு வாபஸ் பெற்றது. ஆனாலும், தடை நீக்கப்பட்ட பிறகும் போராட்டக்காரர்கள் அமைதியாகவில்லை. அரசின் மீது நம்பிக்கை இல்லாததால், இளைஞர்கள் மேலும் தீவிரமாக சாலைகளில் இறங்கி, காவல்துறையுடன் மோதல்களில் ஈடுபட்டனர். பல இடங்களில் கற்கள் எறிதல், வாகனங்கள் சேதப்படுத்துதல், கடைகள் மற்றும் அலுவலகங்கள் மூடப்படுதல் போன்ற வன்முறைகள் வெடித்துள்ளன. இதனால் நேபாளத்தில் சட்டம்-சமாதான நிலைமை பெரிதும் பாதிக்கப்பட்டுள்ளது. இந்தச் சூழ்நிலையில், இந்தியா நேரடியாக பாதிக்கப்பட்டுள்ளது. காத்மண்டு–இந்தியா இடையேயான விமான சேவைகள் பல்வேறு சிக்கல்களை சந்தித்தன. பாதுகாப்பு காரணங்களால், ஏர் இந்தியா மற்றும் இண்டிகோ நிறுவனங்கள் தங்களின் காத்மண்டு சேவைகளை தற்காலிகமாக ரத்து செய்துள்ளன. இது, நேபாளத்திற்கும் இந்தியாவிற்கும் இடையிலான சுற்றுலா மற்றும் வணிகப் போக்குவரத்துக்கு பெரிய தாக்கத்தை ஏற்படுத்தியுள்ளது. மேலும், இந்திய வெளியுறவு துறை அமைச்சகம், நேபாளத்தின் தற்போதைய நிலைமை மிக ஆபத்தானதாக உள்ளதென எச்சரிக்கை விடுத்துள்ளது. “இந்திய குடிமக்கள் யாரும் நேபாளம் செல்ல வேண்டாம். அங்கு ஏற்கனவே உள்ள இந்தியர்கள் அத்தியாவசிய தேவையில்லாமல் வெளியே செல்லாமல் இருக்க வேண்டும். பாதுகாப்பு வழிமுறைகளை கடைப்பிடிக்க வேண்டும்” என்று அறிவுறுத்தியுள்ளது. இந்தியர்களுக்கு வார்னிங்
நேபாளம் இந்தியாவுடன் எல்லையை பகிர்ந்து கொள்ளும் முக்கியமான அண்டை நாடு என்பதால், அங்குள்ள அரசியல் மற்றும் சமூக அதிருப்தி இந்தியாவிலும் எதிரொலிக்கிறது. இந்திய சுற்றுலாப் பயணிகள், தொழிலதிபர்கள், மாணவர்கள் ஆகியோர் அதிகம் செல்லும் நாடாக நேபாளம் விளங்குவதால், இந்த தடை மற்றும் கலவரம் நேரடியாக இந்திய மக்களுக்கும் பாதிப்பை ஏற்படுத்தியுள்ளது.
நேபாளத்தில் சமூக வலைத்தளத் தடை நீக்கப்பட்டாலும், அதன் பின்னணியில் எழுந்த வன்முறைகள் அந்நாட்டின் உள்நிலையை சீர்குலைத்து விட்டன. பாதுகாப்பு காரணங்களால் விமான சேவைகள் நிறுத்தப்பட்டுள்ளன. அதோடு, இந்திய அரசு தனது குடிமக்களை நேபாளப் பயணத்திலிருந்து விலகுமாறு எச்சரிக்கை விடுத்துள்ளது. நிலைமை சீராகும் வரை இருநாடுகளுக்கிடையேயான மக்கள் இடமாற்றமும் சுற்றுலா போக்குவரத்தும் பெரிதும் பாதிக்கப்படும் என்பது மிகவும் முக்கியமானதாகும் .
No comments:
Post a Comment